shcto問得好.
本人由96年尾因不再打工而轉成為自顧人士, 錢就搵唔到幾多, 但賺了一大堆人生經驗, 其實比錢仲寶貴. 以我對創業的見解是不熟不做、不合時不做、合伙不做, 合付以上條件時, 再睇幾個因素, 資本、租金、資本投資、日常洗費、原料價、市場售價、競爭、經濟方向、未來需求等.
其中最重要是預左蝕來做, 做生意個個人都雄心萬丈, 但勝利隨時沖暈頭腦, 就算那行有幾高好準幾好聲譽, 一次錯誤可能損失一半生產, 所以我在完成大學工作時, 將前半生搵番來既幾十萬一次過還了供樓錢, 先樣自己無後顧之憂. 再拆算有多少餘錢, 當時錢不多, 兩夫婦只有一年多洗用, 於是開始了在屋企開公司(soho), 接我最熟悉的電腦硬件及軟件工作, 由上門修理開始至出新機, 及後太太與我決定加入暑假作業市場, 因為太太當時已對這市場有相當了解, 有質素的不多, 只要在市場上佔有3%就已經回本, 有5%就算成功, 而全蝕亦只是五萬元左右(不計人工), 總算膽粗粗開波, 由太太寫作, 我一邊學DTP一面做稿. 當時我太太很樂觀而我就抱著平常心做, 盡量蝕得少而開市場. 工作很辛苦但學到很多關於出版的事物, 亦認識了出版界的人物. 作業果然賺不到錢, 但首年總算是有SALE有人識. 就是因為開始了DTP, 其後有很多學校的DTP工作來了, 由單張至整本200頁四色年刊都有. 另一方面, 太太的補習生意因為出了作業, 更多家長投以信心, 亦確定了她開補習社的路. 當然, 我還有攝影賺錢, 首創了砌機學電腦等, 而我太太就與大學還有PARTIME工作.
回看這幾年成績, 作業打和賺了一批責倉中的書本, 電腦工作淡出(因為而家太多人識), 排版工作半退休(有就做但唔積極搵新客), 攝影工作等市度(我影樓盤相及STOCK為主, 現在正受經濟影響中), 太太的補習工作極好(我既是校監又是校工).

2003年了, 未來我兩的工作還是補習為主, 因為這行業還是大有可為.

要我建議在這淡市中找出路, 我認為首要條件是有一門手藝, 這手藝並不可以由一般新生學子取代的. 如以嚐好為依歸, 暫時還是睇好釣魚界, 釣魚雜誌由三年前零本至今天五本, 用品店又大約卅間勁升至鴨寮街都有得賣, 海水質素因環保及休魚期而提升, 釣魚人數增長是幾何級數. 另一可為是寵物店, 唔生仔及人口老化都是有利因素, 市場由十年前的簡單金魚、雀仔、平價貓狗變成乜都有人買(蛇、水母、蜘蛛等), 夠膽創新很易發達, 我其中一位同期大學同事做七彩神仙, 而家已經係世界級供應商. 而人總離不開食, 一蚊一舊任篤都可以開旺角轉角位地舖, 這行風險大亦係可以搏得好大. 而同攝影有關既行業, 近年好賺既係DCC之類的賣數碼機, 但實在成本好重, 細細間舖都食廿萬貨, 仲要係做水貨先有錢賺, 行貨要同Ｘ成爭價幾乎係冇可能. 如果係要服務業, 我睇好由內地帶貨來香港賣, 從中賺差價. 其中以書呢樣我比較睇好, 大陸攝影書譯本係香港賣貴一倍左右, 一本KODAK的書, 英文如是$100, 中文(繁體)譯本多是$120, 但簡體譯本可能只是$50. 而內地編製的書本隨時平到唔信, 一本兩吋幾三吋厚的專業字典, 同一個版, 香港賣三百, 大陸賣一百. 當然, 呢Ｄ一定係血汗錢, 唔辛苦係得唔到世界財既.

知識形經濟唔係講有冇料, 係講有冇CERT!
現代社會, 新生學子如同受保護動物, 粗勞唔得, 時間長唔得, 工作悶唔得, 冇O野學唔得, 久而久之, 好多工都去晒見過世面既人, 空缺自然買少見少.
經濟唔好本來就係創業既時機, 人工平, 舖租平, 利息低, 甚至有好多正苦及商界優惠, 可是今天是否已到經濟谷底還未可料, 仲記得二千年時, 一片歌舞昇平, 樓市大反彈, 股市亦火烘烘, 點知虛火一過, 股市指數又打回六折, 地產跌多幾成. 創業最難就係睇準時機入市, 一個唔好彩經濟浪頭過了, 幾年所賺一次無晒.

.PS 如果真係想做沖晒業, 記得開間有限公司先去買沖晒機上會, 有咩事都唔使上身呀.

Go ahead and try then.